Bulus Nangi Laawol Gariiri Rooma

1 Nde ɗum suɓi min njaha leydi Itaaliya nder komiwal, sey Bulus e woɓɓe nangaaɓe ngaɗaa nder jungo mawɗo sooji’en bi’eteeɗo Juuliyos. Kanko woni ardiiɗo kawtal sooji’en bi’eteengal Sooji’en Kaysar.

2 Min natti komiwal ƴiwoyngal Adiramitiiyum jahayngal gariije gonɗe fongo maayo nder leydi Aasiya; min ndilli. E min ngondi e Aristarkus, neɗɗo leydi Makidooniya ƴiwoyɗo gariiri Tasaloonika.

3 Nde fini min njottii gariiri Sidon. Juuliyos nani jurumɗum Bulus; o jaɓi Bulus yaha to higooɓe maako ngam ɓe mballamo.

4 Nde min ummii ɗon, min tokki fuuna leydi Sayiifurus ngondi caka ndiyam, ngam hendu sembiɗiraa ton.

5 Min kulti maayo ngo haade Kiliikiya e Bamfiiliya, min njottii gariiri Mira nder leydi Liikiya.

6 Ton ardiiɗo sooji’en on heɓanimin komiwal ƴiwoyngal Alijandiiriya ummaniingal Itaaliya, o nattinimingal.

7 Balɗe ɗuɗɗe komiwal amin waɗi e yaara seese‑seese. E bone min njottorii haade gariiri Kinidus. Nde hendu haɗimin yaaki yeeso, sey min tokkiri fombina haa min njotti Kiriti, leydi ngondi caka ndiyam. Nde min ƴaɓɓii haade Salmoni min tokkiri fongo Kiriti ton to hendu sembiɗiraa.

8 E bone min ƴaɓɓorii, min njottii wigeere bi’eteende Jipporde Bonde haade gariiri Laasiya.

9 Min mbonni carel ɗungel haa nyalnde Humto Ittuki Hakke ƴaɓɓii. Nder carel ngel yaadu nder komiwal e saɗi naa’ seɗɗa. Ngam maajum Bulus hokki caawori,

10 o wi’i, “Bandiraaɓe, mi yi’ii komiwal ngal e ko woni nder maagal fuu wonnoto. Naa’ kanjum tan, ammaa haa e enen maa en kalkay.”

11 Ammaa mawɗo sooji’en ɓurii jaɓuki haala joomu komiwal ngal e pooɗoowo ngal dow haala Bulus.

12 Jipporde komiije to min ngoni wooɗaa nder ndungu. Ngam non ɗuɗɓe wonɓe nder komiwal ngal ɓurii yiɗuki min njaha Finiki ngam min nduuma ton, to ɗum waɗoto. Finiki woni jipporde komiije nder leydi Kiriti, daaraynde lokirre hirnaa e woyla e lokirrehirnaa e fombina.

Hendu Mawndu Dow Maayo

13 Nde hendu fombina fuɗɗi wisuki seese‑seese, huwooɓe nder komiwal ngal kammii ɓe mbaaway yaaki to ɓe ngiɗi. Ɓe ittoyi njamnga darnirga komiwal ngal, min tokki haade fongo leydi Kiriti, min ndilli.

14 Ammaa gaɗa maajum seɗɗa, hendu mawndu bi’eteendu hendu lokirre woyla e fuuna ummoyii daga leydi Kiriti.

15 Hendu ndun taɓɓii komiwal ngal haa min mbaawaayi tokkuki nder mayru. Ngam non, min alindu ndu dillidi e maagal.

16 Nde min tokki haade wondi leydi pamardi ngondi caka ndiyam bi’eteendi Kawda, ndi ustanimin hendu. E bone min pooɗiroyi komiwal pamaral,

17 min nattiningal nder komiwal mangal. Nden ɓe ngaɗi ɓoggi ley komiwal mangal ngal, ɓe kaɓɓingal, ngam to’ ngal feccoo. E ɓe kula to’ ngal nufa nder njaareendi nder ndiyam haade Sirtis. Ngam non ɓe njippini gude gaɗayɗe komiwal dilla, ɓe ali hendu dillidi e maagal.

18 Hendu cembindu ndun waɗi ka fiiki. Ngam non nde fini ɓe puɗɗi hubinki ko woni nder komiwal ngal nder ndiyam.

19 Nder nyalnde tatawre, kamɓe e ko’e maɓɓe ɓe kubini ko ɓe kuutirta nder komiwal ngal nder ndiyam.

20 Balɗe ɗuɗɗe min ngi’aayi naange e koode, ngam hendu ndun waɗii ka falƴinki maayo ngon sembee haa min itti kammunde hisuki.

21 Gaɗa ɓe ngaɗii balɗe ɓe nyaamaayi, Bulus darii yeeso maɓɓe, wi’i, “Daa on njaɓiino haala am, daa on alaayi Kiriti, daa torra ka’a e dullere nde’e heɓaayi’en.

22 Ammaa jooni e mi toroo’on, cembiɗinee ɓerɗe mooɗon, ngam koo go’oto nder mooɗon halkataa, sey komiwal nga’al tan.

23 Allah jeyɗoyam mo mawninaymi liloyii malaa’ikaajo muuɗum, o warii to am jemma.

24 O wi’iyam, ‘Bulus, taa’ hulu, a daroto yeeso Kaysar laamiiɗo Roomanko’en mawɗo. Kadimaa, barka maaɗa Allah hisnay yimɓe wonduɓe e maaɗa nder komiwal fuu.’

25 Ngam non, cembiɗinee ɓerɗe mooɗon, ngam e mi hoolii Allah, ko o wi’iyam ɗum wartay goonga.

26 Ammaa doole hendu no yaaray’en nder wondi leydi ngondi nder ndiyam.”

27 Nder jemmaare sappo e nayawre, nde hendu waɗi ka dilluduki e amin nder Maayo Adiiriya, caka jemma huwooɓe nder komiwal ngal e kammii min ɓadake leydi,

28 sey ɓe ngaɗi ɓoggol poondirngol lugguki ndiyam ɓe ngi’i lugguki ndiyam ɗam koyɗe 40. Min ɓeydi yeeso seɗɗa, ɓe poondi kadimaa, ɓe ngi’i lugguki maajam haade koyɗe 30.

29 Ɓe kuli to komiwal ngal fiya hayre, ngam non ɓe ngaɗi njamko nayo ndarnirko komiwal nder ndiyam ɗam gaɗa maagal, ɓe ngaɗi ka waɗuki do’aare gari weeta.

30 Nden kuwooɓe nder komiwal ngal e ɓe ngiɗi wurtaakingal ɓe ndaɗa, sey ɓe njippini komiwal pamaral nder ndiyam, ɓe ngaɗi bo ɓe njippinay njamko ndarnirko daga yeeso komiwal mangal ngal.

31 Sey Bulus wi’i sooji’en ɓen e mawɗo maɓɓe, “To yimɓe ɓe’e ndaraaki nder komiwal nga’al on kisataa.”

32 Sey sooji’en ɓen taƴi ɓoggi jogiiɗi komiwal pamaral ngal, ɓe alingal ngal tokki ndiyam.

33 Nde gari ɓadii weetuki, Bulus toriiɓe ɓe fuu ɓe nyaama nyamndu. O wi’i, “Hande woni nyalnde sappo e nayawre on nyaamaayi goɗɗum ngam wannaare.

34 Ngam non e mi toroo’on, nyaamee ngam kison, ngam koo laasol hoore go’oto nder mooɗon halkataa.”

35 Nde o wi’i non, o hocci buroodi, o yetti Allah yeeso maɓɓe ɓe fuu, o ŋappitiɗum o fuɗɗi nyaamuki.

36 Sey ɓerɗe maɓɓe cembiɗi, kamɓe maa ɓe kocci ɓe nyaami.

37 Minon wonɓe nder komiwal ngal, min ngaɗii yimɓe 276.

38 Nde ɓe nyaami ɓe kaari, ɓe kocci buhuuji alkamaari gonɗi nder komiwal ngal, ɓe paɗɗiɗi nder ndiyam ngam ɓe ustanangal tedduɗum.

Pusuki Komiwal Ngal

39 Nde weeti huwooɓe nder komiwal ngal anditaayi leydi ndi ɓe njotti. Ɓe kaynii wigeere goodunde njaareendi. Ɓe ngiɗii yaaruki komiwal ngal ton to ɓe mbaawii.

40 Sey ɓe taƴi ɓoggi njamko ndarnirko komiwal ngal, ɓe aliɗi nder ndiyam. Ɗonmaa ɓe pitti ɓoggi ɗiɗum haɓɓiri pooɗirɗum komiwal ngal. Gaɗa maajum, ɓe ƴefti wudere wonde e hoore komiwal ngal, ngam hendu faarangal yeeso, yaarangal daande ndiyam ɗam.

41 Ammaa komiwal ngal fiyi moɓde njaareendi nder ndiyam, hoore maagal nufi, ngal darii ɗon. Geelooɗi ndiyam ngaɗi ka piyuki gaɗa maagal haa ngal pusi.

42 Sooji’en wonɓe nder maagal ciryii dabare no ɓe mbardata curaaɓe wonɓe nder komiwal ngal, ngam to’ goɗɗo nder maɓɓe yinoo daɗa.

43 Ammaa nde mawɗo sooji’en on e yiɗi hisnuki Bulus, o haɗiɓe waɗuki ko ɓe ciryii, o wi’i bawɓe ndiyam arta nattuki nder maajam, mburtoo.

44 Nden horiiɓe boo mbaɗɗoo leɗɗe komiwal ngal e pecce maagal. Non min fuu min ngaɗi min mburtii jam.