1 Bulus sutii Kawtal Mawɓe, wi’iɓe, “Bandiraaɓe am, e ɓernde laaɓunde tokkirmi Allah daga arande haa warki hande.”

2 Sey Hanaaniya, Mawɗo Mawɓe Ardiiɓe Diina wi’i dariiɓe haade Bulus piya honduko maako.

3 Sey Bulus wi’imo, “An maa Allah fiyete, an munaafukiijo! A jooɗi ngam ngaɗanaayam kiita dow dooka Attawra, ammaa an a yewii dooka ɗum ngam a wi’i mi fiyee.”

4 Dariiɓe haade maako mbi’imo, “A huɗu Mawɗo Mawɓe Ardiiɓe Diina mo Allah suɓi?”

5 Bulus wi’i, “Bandiraaɓe am, mi andaa o Mawɗo Mawɓe Ardiiɓe Diina, ngam aayaare wi’ii, ‘Taa’ huɗu ardiiɗo lenyol!’ ”

6 Nde Bulus anditi woɓɓe nder kawtal ngal ɓe Saadusanko’en, woɓɓe nder maɓɓe boo ɓe Faarisanko’en, o wi’i e sembe, “Bandiraaɓe am, min mi Faarisankeejo, ɓii Faarisanko’en. Mi wulla dow kammunde nde ngoodumi dow ummaaki mayɓe.”

7 Nde o wi’i non, sey Faarisanko’en e Saadusanko’en puɗɗi yeddootirki. Kawtal ngal sendii ɗiɗi,

8 ngam Saadusanko’en mbi’i ummaaki mayɓe walaa, malaa’ika’en ngalaa, ruuhuuji ngalaa, ammaa Faarisanko’en e mbi’a ɗum fuu tatum e ɗum woodi.

9 Geddi ɓeydi ummaaki. Woɓɓe daga nder moodiɓɓe Attawra nder Faarisanko’en ndari, ummini geddi kalluɗi, ɓe mbi’i, “Min ngi’aayi goɗɗum ko halli ko neɗɗo o’o waɗi. Ɗum gaɗotooɗum ruuhu koo malaa’ikaajo meddii e maako!”

10 Geddi ɗin ngarti kalluɗi haa mawɗo sooji’en on huli to Bulus ciccitee. Ngam non o wi’i sooji’en maako njaha teetoya Bulus to yimɓe e sembe, ɓe njaaramo wuro sooji’en.

11 Nder jemmaare nden Joomiraawo wangi haade Bulus, wi’imo, “Taa’ hulu! Non no andinirɗaa habaru am nder Urucaliima, doole ngaɗaa non nder gariiri Rooma.”

Dabare Waruki Bulus

12 Nde weeti, woɓɓe Yahuudanko’en kawti ko’e, ɓe kunii wiiki ɓe njarataa ɓe nyaamataa sey to ɓe mbarii Bulus.

13 Kaɓɓuɓe dabare nden ɓurii yimɓe 40.

14 Ɓe njahi to mawɓe ardiiɓe diina e mawɓe, ɓe mbi’iɓe, “Min kunanake Allah min njarataa min nyaamataa, sey to min mbarii Bulus.

15 Jooni, onon e Kawtal Mawɓe, mbi’ee mawɗo sooji’en o waddana’on Bulus, ngaɗon bo on ngiɗi ɓeydon nanuki ko o wi’ata. Minon boo, e min ciryii warukimo ko o yottoo to mooɗon.”

16 Ammaa ɓii minyiraawo Bulus debbo nanii ko ɗum ciryii. Ngam non o yahi to wuro sooji’en ngon, o natti, o wi’ika Bulus.

17 Sey Bulus noddi go’oto nder ardiiɓe sooji’en, wi’imo, “Yaaru kayeejo o’o to mawɗo mooɗon, ngam e mo woodi ko o wi’atamo.”

18 Sey ardiiɗo sooji’en on yaarimo to mawɗo on, o wi’imo, “Nangaaɗo bi’eteeɗo Bulus noddiyam, toriiyam mi wadda kayeejo o’o to maaɗa, ngam e woodi ko o wi’atama.”

19 Mawɗo on nangi jungo maako, fooɗimo wuttudu, ƴamimo, wi’imo, “Ɗume ngiɗɗaa wi’ukiyam?”

20 Kayeejo on nootii, wi’i, “Ardiiɓe Yahuudanko’en kawtii hoore jaango ɓe torete njaaranaaɓe Bulus yeeso Kawtal Mawɓe, ɓe ngaɗay bo e ɓe ngiɗi ɓe ɓeyda nanuki ko o wi’ata.

21 Ammaa taa’ jaɓu ko ɓe mbi’i! Ngam ko ɓuri yimɓe 40 nder maɓɓe ciryake taɓɓaakimo dow laawol. Ɓe fuu ɓe kunake ɓe njarataa ɓe nyaamataa sey to ɓe mbariimo. Jooni ɓe ciryake, e ɓe keɗii ko ngaɗataa.”

22 Mawɗo on wi’i kayeejo on, “Taa’ wi’u koo moye a wi’iiyamka.” Sey o ali kayeejo on dilli.

Bulus Yaaraama Kaysaariya

23 Sey mawɗo sooji’en on noddi ardiiɓe sooji’en muuɗum ɗiɗo, wi’iɓe, “Ciryee sooji’en 200 e sooji’en waɗɗotooɓe pucci kamɓe 70 e sooji’en jogotooɓe labbe 200, nangon laawol yaaki gariiri Kaysaariya njamndi joweenayi hande jemma.

24 Ciryee pucci ɗi Bulus waɗɗotoo njaaronmo jam to Felis gomnaajo.”

25 Mawɗo on windi ɗerewol, wi’i,

26 “Min, Kalawdiyus Lisiya, e mi hownumaa, yaa Felis, laamiiɗo mawɗo.

27 Neɗɗo mo lildoymaami, ardiiɓe Yahuudanko’en nangiimo, e ngiɗi warkimo. Nde ɗum wi’iyam o Roomankeejo, mi yaadii e sooji’en, teetumoomi.

28 Nde e mi yiɗi anduki ko ɓe ngulloriimo, njaarumoomi yeeso Kawtal Mawɓe Yahuudanko’en.

29 Mi tawii dow dooka maɓɓe tan ɓe ngulloriimo, ammaa ko ɓe ngulloriimo hewtaayi o waree koo o maɓɓee nder suudu cural.

30 Nde ɗum wi’iyam Yahuudanko’en ciryake dabare warukimo, ɗon e ɗon mi lildoyiimo to maaɗa. Mi wi’i gulloyiiɓemo njaha mbi’a ko o waɗi yeeso maaɗa.”

31 Sooji’en ɓen ngaɗi ko mawɗo maɓɓe wi’iɓe, ɓe kocci Bulus jemma, ɓe njaarimo gariiri Antifaatiris.

32 Nde fini, sooji’en garɓe e koyɗe co”ii wuro sooji’en. Ɓe aldi Bulus e sooji’en waɗɗotooɓe pucci njaada e maako.

33 Nde sooji’en waɗɗiiɓe pucci ɓen njottii Kaysaariya, ɓe kokki gomnaajo on ɗerewol ngol, ɓe ali Bulus to jungo maako.

34 Nde gomnaajo on jangi ɗerewol ngol, o ƴami ndiye leydi Bulus danyaa. Nde o nani Bulus no neɗɗo leydi Kiliikiya,

35 o wi’imo, “Mi nanay ko mbi’ataa to gulliiɓema ngarii.” Sey o wi’i reenooɓe ndeena Bulus nder laamorde nde Hirudus mahi.